VCBC in lunglawm tein kan in don!

Canada ram Vancouver khua i a um mi Khrihfa bu kan si. Vancouver khua cu vawleicung khuadawhcem pakhat ah ai tel mi a si caah kan khua te hi kan tlaihchan khun. Chokhlei le Cherry par phunphun an parnak khua a si. Tlang le rili nih a kan kulh. Ai dawh hringhran ko. Harsatnak ram in hi tluk ai dawh mi khua le ram ah a rak kan phak tertu kan Pathian hi thangthat lo in kan um kho lo.

Cucaah Pathian sunparnak ca dingah tiin VCBC cu 2005 December ni 18 ni ah rak dirh a si. Miphun thleidannak um lo in Khrih dawtnak he Pathian kan thangthat tti. Lairam khua ah hlah maw kan i pumh rua tiah kan i ruah tawn.

Zarhpini fatin te 2:00 – 6:00pm tiang pumhnak kan ngei tawn. Kan i pumhnak address cu 7650 Jasper Crescent, Vancouver, BC V5P 3S5 ah a si. Vancouver na rak tlawn ahcun kan Biakinn pumh ta lo in rak kan kir taak hlah uh tiah kan in sawm hna.

A kan leeng mi nan cungah Pathian nih thluachuah in pe ko hna seh.


Kan tuanbia tawi cu hi ti in a si.

Canada ram Vancouver khua ah 1997 thok in kan Chin mi hna phanh hram kan rak i thok. 2002 tiang ah hin kan rak i chap tuk lo. 2003 ah Pathian lamhruainak in minung tamdeuh kan hon i chap. Cu tikah zarhteni zanlei chair tein thlacam pumhnak rak ngeih a si. Minung kan hon tam deuh tikah kan bia le hla tein Pathian kan thangthat duh caah le pumsa, thinlung, thlarau lei kan thankhawhnak ding caah tiin Vancouver Chin Christian Fellowship (VCCF) cu member (32) in Jan 3, 2004 ah dirh a rak si.

2004 March thla thok in Knight Gospel Church cu kan hlan i, zarhpini fatin te Pathian thangthatnak kan rak ngei. 2005 ah nubu le mino riantuannak zong thok a si. 2005 kum dong leiin Sunday School department dirh in kan fanau le hna cu Sunday School cawnpiak hram kan rak thok. Member zong kan hon karh thluahmah tikah VCCF cu Krihfabu tlamtling ah dirhmun san terin December 18, 2005 ni ah Vancouver Chin Baptist Church (VCBC) tiin amin thlen a si.

2007 ah kan umnak ramkulh cozah ah register kan tuah. 2008 ah Canadian Baptists of Western Canada ah member kan lut.  2009 ah Canada Revenue Agency ah “Charity” bu sinak kan sok i an kan pom. Cun Canada ramchung um Chin Khrihfa bu kip i hawikomhnak “Chin Christian Fellowship of Canada” zongah member kan si.

Kumfatin tein General Meeting kan tuah i, kum hinh ah voikhat in thimnak kan tuah. General Meeting hi Khrihfabu i hruainak ah nawlngeihnak asangbik a si. Phunghram le by-laws ning zohthan a si thawn.

Biakinn kan ngeih khawh rih lo caah bu dang Biakinn hlanin kan i puum. Cu caah Biakinn ngeih khawh hi kan saduhthah ngancem pakhat a si. Thlacamnak in kan bawm cio uh.

(Note: 1997 hlan ah hin kan miphun a si mi chungkhar pakhat cu kum saupi an rak um cang. Cu hna cu Chin pasaltha Salai Tin Maung Oo i, a chuah pi chungkhar hna an si. An nih chungkhar hi bu dang ah ai puum mi an si. )


Cawlcanghnak

Khrihfa bupi cawlhcanghnak hi a tam ngai ngai. Cu lakah atanglei bantuk in tlawmpal kan hon taarlangh.

  • Zarhpini fatin te pumhnak kan ngei.
  • Kumkhat ah a tlawm bik voikhat in “Workshop” kan ngei kho. Hi workshop ah hin mibu i hruai ning, kan umnak ram i kan theih a herh mi kong hna i chimh le a ruah ti a si.
  • Damlo le sizung um mi sinah thlacamnak le tangka lei in kan ti khawh tawk tein i bomhchanhnak kan ngei.
  • Nauthar chuak mi poah kan zoh hna.
  • Ngeihchiatnak a tong mi chungkhar hna cu Pathian bia in hnemh an si.
  • Member innkip ah Pastor te le Khrihfa upa hna cu thlacamnak an ngei tawn.
  • Kumkhat ah voikhat in “Crusade” kan ngei.
  • Kumkhat ah voikhat in “Picnic” kan kal hna.
  • Khrihfa mi hna i, kan ni sunglawi ni hna cu lungtho tein kan hmangti tawn hna.
  • Ramthar riantuannak cu kan rian biapi ah kan i chiah. Zumtu zeimawzat zong Pathian nih a kan pek. Hi riantuannak hi dinh kan i tim lo.
  • Ramthar rian lawng siloin kan ramchung lei ah harsatnak a tong mi hna le bu caah bomh a kan hal mi hna sinah kan ti khawh tawk in kan bomh tawn hna.
  • Kan ramchung lawngah siloin vawleicung hmunkip ah nikhua ruangah harsatnak ngan a tong mi hna sinah kan ti khawh tawk in kan bomh ve tawn hna.

Bu dang he Pehtlaihnak

VCBC cu atanglei bu hna he pehtlaihnak kan ngei.